عشان الغبش و كمان مدني السني والحصاحيصا

والله يا جماعة المريخ اصبح نار منقد و الواحد عديل كده بخلف رجل علي رجل و يختار اي حداشر و كمان اي واحد من تلاتة في المرمي الدفاع ماشاءالله الوسط يا لطيف الهجوم كاسحة الالغام وبعدين الواحد لازم يوزع ثورة الابداع علي عموم السودان يوم في بورسودان عشان الغبش و كمان مدني السني والحصاحيصا لها مكان عند عجب الزمان أصلو دي بلد نميري احمد سعيد حارق قلوب الجماعة بالايام الخوالي والامل بالشمال أصلو قديماً قالو لالوب بلدنا و لا تمر الناس . ما علينا نعود للزعيم و قصة الدوري الممتاز و لغة العضلات و الماشاف الدوري المقفل في السبعينات عيان بيان يجهز الموية البارده والفسيخ و البطيخ لزوم الجؤ الحار و و فرحة الانتصار .والله اشم ريحة دوري بدون هزيمة او تعادل ولو ما خايف اقول بدون احراز هدف من الان و البداية بحي العرب وحتما مباراة الجماعة أسهل من ناس الامل و دي بالذات لينا فيها حكاية و قالوا العجب المرة دي حالف يجعل الداير في بلد و الكان في بلد ( دايرو كان ) و انا مالي ومال المشاكل ده العجب وان قال فعل .
*اليومين دي الجماعة ما صدقو لقو ليك احمد عادل و قال روني اصلوا روني ده خنزير انجليزي ..
*الحفيان راح شمار في مرقة لسة بيكوس للرملة الدقاقة ..قال ايه يجبو المراة
*كان المراة بتجيب قينان كان الموردة سجلت الحاج متولي ..
*حكم مباراة جزيرة الفيل و رجل الراية قالو حرام بالبيضة اصلو ده هلالي وكمان دولي ...
*تأهل المريخ و لاجديد .الاصل ان تكون بالنهائيات..
*فرحة الكونفدرالية بالزعيم اكبر من فرحة الهلال بالخنزيرية ..
*تأهل كل من الصفاقصي و الترجي تونس و حرس الحدود المصري ..
*كلوا عند الزعيم ليمون ..
*بكرة نجتمع بالثغر الباسم ونزف العريس الجاسم
*حتماً نلتقي لا للوداع .....حقاً انتم الصفوة .....
ود الشايب .