أبو أربعة
* نحن نشتهر بأننا نكني الناس كثيراً.


* مثلاً عندنا أب شنب وأبو ضنب وأب دقن وأب قطعة ( الزول البتمتم ) وأبو شلوخ وأبو كلام.


* حتى في الأفلام الهندية استطعنا أن نضع عليها بصمتنا.


* فكان أبو شلخة وأبو مفك.


* وأم سكاسك وأم صفقاً عراض


* وحتى في الحشرات بنعرف الدودة أم أربعة وأربعين.


* وأشهر الكنيات عندنا أب ستة.


* وسبق للهلال العظيم أن فاز بذلك اللقب أمام الترجي.


* ولاحظوا الترجي فيها ستة حروف.


* وهاهو يعود من جديد ويفوز بلقب أب أربعة.


* ولاحظوا ترجي فيها أربعه حروف!


* الحمدلله التوانسة ما سموا فريقهم الترجيروباوي.


* الترجيروباوي فيها دستة حروف.


* ياربي إنييمبا فيها كم حرف ؟


* قال لي الأخدوا أربعة ديل ناس روي!


* قلت ليه انتو عندكم حداشر روي ؟


* سكت.


* قلت ليه كان عندكم حداشر روي مشكلة وكان ماعندكم مشكلة.


* مزمل سأل عن عدد أهداف الترجي في الجماعة.


* في الآونه الأخيرة ياميزو خمسة وخمسة وستة وخمسة وتلاتة (تعادل والي الدين) وواحد وواحد وأربعة يعني ثلاثين هدفاً من فريق واحد في الشبكة الأوسع والأكبر!


* يعني عدد أهداف الترجي أكتر من عدد اللاعبين في الكشف.


* بما فيهم المجنسين الاتنين!


* يعني عدد أهداف الترجي في الهلال يساوي عدد اللاعبين مضاف اليهم الجهاز الفني!


* كل الصحف رائعة بدون شك لأنها عمل ثقافي ومعرفي رائع.


* وتزداد الصحيفة روعة كلما كانت فيها مساحات للرأي الآخر.


* وتقل روعة الصحيفة كلما كانت الأقلام التابعة فيها تجد مناخاً مناسباً وتعمل كأبواق تردد بدون تردد.


* أنا المحيرني ليه زادوا عدد أعضاء مجلس إدارة الجماعة ؟


* كده العدد أصبح أزيد من خمسة عشرعضواً


* لأنو الفازوا تمانية زائد تلاتة مضافين يصبح العدد حداشرمضاف اليهم الأرباب وصلاح إدريس وعلي أحمد والريس والكاتب الصحفي ورجل الأعمال والمقرر الوحيد والبمسكل من برة والجوة ينطوا من الاتفاق يبقى العدد تسعة عشر عضواً بمجلس الجماعة.


* موش قلت ليكم الأرباب ده قبيلة براه؟


* سألني قال لي ليه اللجنة ما طلعت قرار نقاط النيل ؟


* قلت ليه سألتني.


* القرار واضح لكن اتأجل إعلانه عشان الجماعة ما يقولوا الاتحاد قصد تحطيم معنوياتهم بإعلانه للقرار وهم في مرحلة إعداد للمجموعات، عشان كده الاتحاد راجيهم ينقرضوا حتى يقرضهم بالقرار.


* اللهم اعط النيل نقاطه واخصم من رصيد (الزاغو) من مباراه معلنة خصماً. يجعلهم يتعاركون من أجل البقاء في الممتاز حسب القانون واللائحة يا رحمن.


* اللهم آمين.


سلك كهربا:


الموية اتعززت في الأرض ربك رب الخير جابها من السما... مدد


والى لقاء


سلك